‘n Vrywillige likwidasie kan verwys na beide ‘n vrywillige likwidasie van ‘n solvente maatskappy of ‘n vrywillige likwidasie van ‘n insolvente maatskappy.
Vrywillge likwidasie deur lede (solvente maatskappy)
‘n Solvente maatskappy kan gelikwideer word by wyse van ‘n spesiale resolusie, in gevolge artikel 80 van die Maatskappywet van 2008. So ‘n besluit is egter kragteloos indien die entiteit nie by die “Companies and Intellectual Properties Commission (“CIPC”)” geregistreer is nie. Alternatiewelik kan ‘n solvente maatskappy vrywilliglik gelikwideer word by wyse van ‘n hofaansoek ingevolge artikel 81 van die Maatskappywet van 2008.
Daar is verskeie redes waarom ‘n solvente maatskappy kan besluit, by wyse van ‘n spesiale besluit of hofaansoek, dat dit gelikwideer moet word. Redes kan insluit dat die doel waarvoor die maatskappy opgerig was voldoen was aan of dat die direkteure verantwoordelik vir die bestuur van die maatskappy nie meer oor die weg kom nie of in geskille vasgevang is.
Vir watter rede ookal die solvente maatskappy gelikwideer is, die uiteindelike gevolg sal wees dat die entiteit ontbind en kan moontlike toekomstige eise teen die maatskappy en / of direkteure voorkom.
Vrywillige likwidasie deur skuldeisers (Insolvente maatskappy)
‘n Insolvente maatskappy kan vrywillig gelikwideer word wanneer die maatskappy ‘n spesiale besluit geneem het, ingevolge artikel 349 van die Maatskappywet van 1973. So ‘n besluit is egter ook kragteloos indien die entiteit nie by die “Companies and Intellectual Properties Commission (“CIPC”)” geregistreer is nie.
Menige redes bestaan vir ‘n maatskappy wat insolvent is om te besluit om vrywillig gelikwideer te word. Van die redes kan wees dat die maatskappy feitlik insolvent is (i.e., dat die maatskappy se laste meer is as sy bates tydens ‘n gegewe tydstip) of dat die maatskappy handels-insolvent is (bv., die maatskappy word geag nie sy skuld kan betaal soos en wanneer hy moet vir die volgende twaalf maande nie) of dat die direkteure in lyn met wetgewing optree deur nie aan te hou handel dryf op ‘n roekelose wyse terwyl die maatskappy insolvent is nie.
Persoonlike aanspreeklikheid van direkteure
Artikel 22 gelees saam met artikel 77 van die Maatskappyewet van 2008 hanteer persoonlike aanspreeklikheid van direkteure en maak voorsiening dat wanneer dit op enige gegewe tydstip voorkom of die besigheid aanhou handel dryf op ‘n roekelose of growwe nalatige basis of met die intensie om enige persoon te bedrieg, kan die Hof op aansoek van die Meester of enige krediteur of aandeelhouer, verklaar dat enige party wat wetende betrokke was by die voortbestaan van besigheid, persoonlik aanspreeklik gehou kan word vir enige verlies of skade.
Daarom is dit van kardinale belang dat direkteure seker maak dat hulle op ‘n volgehoue basis presies weet wat die stand van die finansiële posisie en ook die kontantvloei situasie van die maatskappy is op enige gegewe tydstip, om te voorkom dat die besigheid bedryf word op ‘n roekelose of growwe nalatige manier.
Alhoewel daar in hierdie artikel slegs verwys word na ‘n maatskappy, is dieselfde beginsels van toepassing op ‘n beslote korporasie.
Vir meer inligting oor die onderwerp kontak vir Enrico Acker by 044 601 9900 / enrico@rgprok.com .
