Ons nader Testamente Week 2024 en is dit noodsaaklik om die waarde van ‘n goed gestruktureerde testament, asook die potensiële uitdagings daarvan om intestaat (sonder ‘n testament) te sterf, te oorweeg.
In Suid-Afrika onderskat baie mense die belangrikheid daarvan om ‘n testament op te stel, en besef dikwels nie die impak daarvan om sonder een te sterf nie. Dit kan egter beduidende nadelige gevolge hê vir die langslewende familielede, wat onnodige emosionele en finansiële stres, sowel as vertragings in die verkryging van hul regmatige erfenis, kan ervaar.
Die Vryheid om ‘n Eksekuteur aan te stel
Suid-Afrikaanse wetgewing gee individue die vryheid van testasie, wat hulle in staat stel om hul bates volgens hul wense te verdeel. Dit sluit die reg in om ‘n eksekuteur aan te stel, wat die boedel sal bestuur, enige skulde sal vereffen en die oorblywende bates sal verdeel volgens die testament. Die rol van ‘n eksekuteur is van kardinale belang om te verseker dat die oorledene se wense nagekom word en dat die boedel doeltreffend geadministreer word.
In die afwesigheid van ‘n testament is daar geen duidelike aanwysings oor hoe die boedel hanteer moet word nie, en dit sal dit dus onder die toesig van die Meester van die Hooggeregshof plaasvind, en deur middel van die Wet op Intestate Erfopvolging beredder moet word. Omdat daar nie ‘n testament is waarin ‘n eksekuteur aangestel word nie, sal die bedroefde familie en erfgename self ‘n eksekuteur moet nomineer. Die Meester van die Hooggeregshof het egter die diskresie om die familie se genomineerde eksekuteur te verwerp en ‘n ander eksekuteur, bekend as ‘n eksekuteur datief, aan te stel. Hierdie proses kan tydrowend wees, veral indien die familielede nie kan kom ooreenkom wie aangestel moet word nie.
Kompleksiteite van Intestate Erfopvolging
Wanneer die Meester ‘n eksekuteur vir ‘n boedel aanstel, kan hulle vereis dat die eksekuteur sekuriteit moet stel, wat ‘n bykomende finansiële las op die boedel kan plaas. Met ‘n testament kan die oorledene egter voorsiening maak om van hierdie vereiste afstand te doen en sodoende kostes spaar.
Dit beteken ook dat die boedel volgens die reëls van die Wet op Intestate Erfopvolging verdeel sal word, wat slegs bloedverwantskappe in ag neem. Selfs al was die oorledene se geliefdes bewus van hul laaste wense, moet die Wet streng gevolg word, wat dikwels lei tot uitkomste wat nie in lyn is met die oorledene se bedoeling nie. In sommige gevalle mag dit nodig wees om bates te likwideer om aan die vereistes van die Wet te voldoen, wat die verkoop van huise, voertuie en ander besittings kan beteken, en die afhandelingsproses verder kompliseer.
Invloed op Minderjarige Kinders en Voogdyskap
Die afwesigheid van ‘n testament kan ernstige gevolge hê vir minderjarige kinders, veral as albei ouers oorlede is. In sulke gevalle mag daar onsekerheid wees oor wie as hul voogde aangestel moet word, wat tot potensiële geskille binne die familie kan lei. Die emosionele las op die kinders, gekombineer met die onsekerheid rondom hul toekoms, kan oorweldigend wees.
Sonder ‘n testament sal die kinders se erfenis deur die Voogdyfonds by die Meester van die Hooggeregshof gehou word totdat hulle agtien jaar oud is. Hierdie situasie voorkom dat familielede of vriende ‘n trust kan oprig om die kinders se bates te beskerm of voorwaardes aan die voordele van die boedel kan heg om hul toekoms te verseker.
Maak jou Testament ‘n Prioriteit
Alhoewel die dood onvermydelik is, kan die gemoedsrus wat voortspruit uit ‘n goed gestruktureerde testament nie oorbeklemtoon word nie. Dit is noodsaaklik om die opstel van ‘n testament te prioritiseer om te verseker dat jou bates volgens jou wense verdeel word en jou geliefdes beskerm word teen onnodige stres en onsekerheid.
Neem die tyd om met ‘n regskenner te konsulteer wat jou unieke behoeftes verstaan en jou kan lei in die uitoefening van jou reg op vryheid van testasie. Jou geliefdes sal ewig dankbaar wees en jou onthou soos jy wil hê hulle moet.
Artikel deur Sophia Steyn, Assosiaat (LLB)
Vir meer inligting, kontak Sophia by 044 6012 9900 of sophia@rgprok.com. www.rauchgertenbach.com
