HOE KWALIFISEER EK VIR ALGEMENE SKADE IN ‘n PADONGELUKKEFONDS EIS?
Persone wat in ‘n motorongeluk beseer word, en wat nie skuld dra in die veroorsaking van die ongeluk nie, sal ‘n eis teen die Padongelukkefonds kan instel. Eise vir algemene skade, gelede mediese uitgawes, gelede verlies aan inkomste en toekomstige verlies aan inkomste kan ingestel word.
Algemene skade word beskryf as nie-vermoënsregtelike skade en beteken dat die skade nie maklik in geldwaarde vasstelbaar is nie. Dit behels dat daar ondermeer geëis word vir pyn, lyding en ongerief wat veroorsaak word deur die fisiese en/of emosionele skade wat ‘n persoon mag lei. In ‘n onlangse hofsaak het die hof verwys na algemene skade as aspekte wat verband hou met die skending van ‘n persoon se fisiese integriteit, pyn, lyding, emosionele skok, misvorming, ‘n vermindering van ‘n persoon se lewensverwagting en die verlies van lewens-genietinge.
‘n Persoon se reg om algemene skade te eis word wél deur die Padongelukkefonds beperk deurdat bewys verskaf moet word om aan te toon dat die besering ernstig van aard is. ‘n Mediese praktisyn moet die beseerde persoon ondersoek en ooreenkomstig riglyne, wat in die regulasies uitgevaardig is, beoordeel of die besering ernstig is.
Twee toetse word aangewend om te bepaal of ‘n besering ernstig is.
Eerstens kan ‘n mediese praktisyn bevind dat ‘n persoon se beserings 30% of meer van sy liggaam aantas. Beserings wat gewoonlik binne die kategorie val is traumatiese brein beserings (TBI), beserings wat paraplegie of kwadriplegie tot gevolg het en/of die amputasie van ‘n ledemaat. Daar kan ook nog ander vorme van beserings wees wat in die kategorie val soos by voorbeeld ‘n kombinasie van verskillende beserings.
Die tweede toets wat aangewend word staan bekend as die “narratiewe toets” en behels dat beserings as ernstig gekwalifiseer sal word mits:
● Daar ‘n langtermyn beperking en/of die verlies van ‘n liggaam funksie op die besering volg.
● Permanente en/of ernstige misvorming plaasvind.
● Die besering ernstige langtermyn geestelike afwyking en/of gedragsversteurings tot gevolg het.
● In die geval van ‘n miskraam.
Die mediese praktisyn sal ‘n RAF 4 vorm voltooi om te bevestig dat hy van oordeel is dat die beserings as ernstig gekwalifiseer word.
Algemene skade kan nie maklik gekwantifiseer word nie. Die howe bepaal algemene skadevergoeding deur vorige beslissings waar persone soortgelyke beserings opgedoen het, te bestudeer en dan ‘n bedrag wat redelik en billik is toe te ken. Howe is egter nie gebonde aan ander howe se toekennings nie, maar sal nie sonder behoorlike regverdiging daarvan afwyk nie. Faktore wat ‘n hof mag beïnvloed om ‘n redelike en billike bedrag skadevergoeding toe te ken sluit in die ouderdom en geslag van die beseerde persoon, die erns en die aard van die besering en ook soms die toekomstige mediese behandeling wat so ‘n persoon sal moet ontvang.
Dit is belangrik om ‘n bekwame regspraktisyn aan te stel te einde te verseker dat die regte proses gevolg word en dat u redelike en billike vergoeding ontvang vir die beserings wat in ‘n motorongeluk opgedoen word.
Artikel deur Jean-Pierre van Zyl, Kandidaat Prokureur (LLB)
Vir meer inligting kan Jean-Pierre gekontak word by jean@rgprok.com of 044 601 9900. www.rgprok.co.za
__
Vrywaring
Geen inligting in hierdie publikasie vervat sal geag wees die lewering van regsadvies te wees in spesifieke aangeleenthede nie. Lesers sal verantwoordelik wees om sodanige regsadvies van hulle eie regsspan te ontvang. Hierdie publikasie is slegs vir opvoedkundige en inligtingsdoeleindes.
